უმაღლესი ხარისხის თევზის ქონი, რომელიც ომეგა-3 ცხიმოვანი მჟავების (EPA და DHA) ბუნებრივი წყაროა. ორგანიზმისთვის მათი საკმარისი რაოდენობით მიწოდება განსაკუთრებით მნიშვნელოვანია ორსულობის მიმდინარეობაში მათი დიდი როლის გამო. DHA ტვინის ქსოვილების მნიშვნელოვანი სამშენებლო ბლოკია და ხელს უწყობს კოგნიტური ფუნქციების, მხედველობისა და ნეირონების განვითარებას. მეორე მხრივ, EPA ხელს უწყობს გულ-სისხლძარღვთა და იმუნური სისტემების ფუნქციონირებას, შეიძლება, დადებითად იმოქმედოს დედის განწყობაზე და ხელი შეუშალოს მშობიარობისშემდგომი დეპრესიის განვითარებას.

ქოლინი ორგანიზმის მიერ მცირე რაოდენობით გამომუშავდება და უნდა მივიღოთ საკვებიდან, უმთავრესად, ქათმის კვერცხიდან, თხილიდან, კომბოსტოდან და ქატოდან. რაციონში ქოლინის ადეკვატური რაოდენობა ხელს უწყობს ნერვული მილის დეფექტების თავიდან აცილებას და ნერვული სისტემისა და თავის ტვინის ნორმალურ განვითარებას. ქოლინი ასევე მნიშვნელოვან როლს ასრულებს პლაცენტაში საკვები ნივთიერებების ტრანსპორტირების პროცესში და ამცირებს ჰიპერტენზიის ან II ტიპის დიაბეტის განვითარების რისკს მოგვიანებით ბავშვის ცხოვრებაში.

A ვიტამინი ბუნებრივად გვხვდება ცხოველურ საკვებში რეტინოლის, ხოლო მცენარეებში ბეტა-კაროტინის სახით და მისი ძირითადი წყაროებია ღვიძლი, კვერცხი, კარაქი, ყველი, თინუსი და გველთევზა. ის აუცილებელია ქსოვილების ზრდისთვის და მონაწილეობს ნაყოფის მხედველობის, ფილტვებისა და ძვლების განვითარებაში. გარდა ამისა, ის ასევე ხელს უწყობს დედის იმუნური სისტემის გამართულ ფუნქციონირებას და ხელს უწყობს მის განვითარებას ბავშვშიც.

D ვიტამინი ორგანიზმის მიერ მზის ზემოქმედებისას სინთეზირდება ან საკვებთან ერთად მიიღება და მისი ძირითადი წყაროებია ცხიმიანი თევზი, კვერცხი და ღვიძლი. ის მნიშვნელოვან როლს ასრულებს ნაყოფის ძვლის მინერალიზაციაში და ხელს უწყობს იმუნური სისტემის განვითარებასა და ფუნქციონირებას. კვლევები³ ვარაუდობს, რომ ორსულობის დროს D ვიტამინის დეფიციტი შეიძლება უკავშირდებოდეს არასასურველ ზეგავლენას ბავშვის კოგნიტურ ფუნქციებზე და ასოცირებული იყოს გარკვეული ნევროლოგიური დარღვევების რისკთან.

E ვიტამინი ერთ-ერთი ყველაზე ძლიერი ბუნებრივი ანტიოქსიდანტია. ის ყველაზე დიდი რაოდენობით გვხვდება თხილში, მცენარეულ ზეთებსა და ავოკადოში. ის იცავს განვითარებად უჯრედებს ოქსიდაციური სტრესისგან და ხელს უწყობს იმუნური სისტემის ფუნქციონირებას. E ვიტამინის ნორმალური დონის შენარჩუნება ხელს უწყობს სპონტანური აბორტის ან ფეტალური მემბრანების ნაადრევი რღვევის რისკის შემცირებას.

VitaMK7^® არის K ვიტამინის უმაღლესი ხარისხისა და ბიოშეღწევადობის ბუნებრივი წარმოებული. მისით უმდიდრესი საკვები წყაროებია მწვანე ფოთლოვანი ბოსტნეული, კომბოსტოს მწნილი და მცენარეული ზეთები. ის ძალზე მნიშვნელოვანია ორსულობის დროს, რადგან გავლენას ახდენს სისხლის შედედებასა და მასთან დაკავშირებულ პროცესებზე. გარდა ამისა, ის ასევე ხელს უწყობს ძვლების ნორმალურ განვითარებას და ამცირებს ზრდასრულ ასაკში ოსტეოპოროზის რისკს.

C ვიტამინი, ანუ ასკორბინის მჟავა, ჯანმრთელობისთვის უმნიშვნელოვანესი ვიტამინია, რომლის ძირითადი წყაროა ციტრუსები, წიწაკა, კენკრა და კივი. ის უაღრესად მნიშვნელოვანია ნაყოფის სათანადო განვითარებისთვის კოლაგენის სინთეზში მონაწილეობის გამო, რომელიც შემაერთებელი ქსოვილის აუცილებელ კომპონენტს წარმოადგენს. ვიტამინი C რკინის შეწოვასაც უწყობს ხელს, რომელიც მნიშვნელოვანია სისხლში ჟანგბადის ტრანსპორტირებაში მისი როლის გამო.

თიამინი, რომელსაც ზოგჯერ ვიტამინ B1-საც უწოდებენ, ბუნებრივად გვხვდება მარცვლეულში, პარკოსნებში, თხილსა და ღორის ხორცში. ის აუცილებელია ნაყოფის ნორმალური განვითარებისთვის, რადგან მონაწილეობს მეტაბოლურ პროცესებში, ცილების სინთეზსა და ნერვული სისტემის ფუნქციონირებაში. გარდა ამისა, ის ასევე ხელს უწყობს ჭრილობების შეხორცებას და ამსუბუქებს ნეიროპათიულ ტკივილს.

რიბოფლავინი, ანუ B2 ვიტამინი, ყველაზე დიდი რაოდენობით გვხვდება რძეში, კვერცხსა და თხილში. ის აუცილებელია ნეიროტრანსმიტერების სინთეზისთვის და გავლენას ახდენს ბავშვის თავის ტვინისა და ნერვული სისტემის განვითარებაზე. ის ასევე მონაწილეობს საკვები ნივთიერებების ენერგიად გარდაქმნაში, რაც აუცილებელია ნაყოფის სწორი განვითარებისთვის.

ნიაცინს ზოგჯერ B3-საც ვიტამინს უწოდებენ და მისი ძირითადი წყაროა ხორცი, თევზეული, ზღვის პროდუქტები და მარცვლეული. ის აუცილებელია დნმ-ის, გენეტიკური მასალის, სინთეზისთვის, რომელიც პასუხისმგებელია ნაყოფის უჯრედების განვითარებაზე. გარდა ამისა, ის ასევე მნიშვნელოვან როლს ასრულებს ჰორმონების გამომუშავებაში, ბავშვის ნორმალური განვითარებისთვის კი ძალიან მნიშვნელოვანია ჰორმონების სტაბილური დონის არსებობა.

B6 ვიტამინი, ანუ პირიდოქსინი, ბუნებრივად გვხვდება შინაური ფრინველის ხორცში, ცხიმიან თევზში, ღვიძლსა და კარტოფილში. ის ხელს უწყობს ორგანიზმის მიერ ცილების შეწოვის გაუმჯობესებას და იმუნური და ნერვული სისტემების ფუნქციონირებას. თუმცა, მისი დადებითი თვისებები ამით არ შემოიფარგლება, რადგან პირიდოქსინი ასევე ხელს უწყობს საკვებიდან ფოლიუმის მჟავასა და რკინის შეწოვას და მონაწილეობს სისხლის უჯრედების ფორმირებაში.

Quatrefolic^® ფოლიუმის მჟავას ინოვაციური აქტიური ფორმაა, რომელიც უაღრესად მნიშვნელოვანია ნაყოფის ნორმალური განვითარებისთვის. ის აუცილებელია ნერვული მილის ჩამოყალიბებისა და დახურვისთვის, რომლიდანაც თავისა და ზურგის ტვინი წარმოიქმნება. მისმა დეფიციტმა შეიძლება გამოიწვიოს სერიოზული დეფექტები, როგორიცაა სპინა ბიფიდა, ისევე, როგორც ნაადრევი მშობიარობისა და ნაყოფის მალნუტრიციის რისკის ზრდა.

ვიტამინ B12-ს ზოგჯერ კობალამინსაც უწოდებენ და მისი ძირითადი ბუნებრივი წყაროა ცხოველთა შიგნეული, ცხიმიანი თევზი, ზღვის პროდუქტები და რძის პროდუქტები. ის აუცილებელია სისხლის წითელი უჯრედების ფორმირებისთვის, დნმ-ისა და ნეიროტრანსმიტერების სინთეზისთვის და, რაც მთავარია, ფოლიუმის მჟავას აქტიურ ფორმაში გადაყვანისთვის. B12 ვიტამინის დეფიციტმა შეიძლება გამოიწვიოს ანემია, გაზარდოს პრეეკლამფსიისა და ნაადრევი მშობიარობის რისკი.

ბიოტინი, რომელიც ასევე ცნობილია, როგორც B7 ვიტამინი ან H ვიტამინი, ბუნებრივად გვხვდება კვერცხში, თხილსა და ფოთლოვან ბოსტნეულში. ის ჩართულია მეტაბოლურ პროცესებში, ხელს უწყობს კანისა და თმის ჯანმრთელობის შენარჩუნებას და შესაძლოა, მნიშვნელოვანი როლი ითამაშოს ბავშვის იმუნური სისტემის განვითარებაში. მისი დეფიციტი ძალზე იშვიათია და ყველაზე ხშირად ორსულობის პირველ ტრიმესტრში ვითარდება.

მულტიმინერალური კომპლექსი კალციუმის კარბონატის შემცველი ზღვის წყალმცენარეებისგან, რომლებიც კალციუმის ბუნებრივი წყაროა. კალციუმი მნიშვნელოვან როლს ასრულებს ჩონჩხის განვითარებაში ძვლის მინერალიზაციაზე მისი ზემოქმედების გამო. ის ასევე ხელს უწყობს კუნთების, მათ შორის, გულის კუნთის სწორ ფუნქციონირებას და აუცილებელია კუნთების შეკუმშვისთვის. მისმა ნაკლებობამ შეიძლება გამოიწვიოს ნაყოფის ზრდის შეფერხება და ხელი შეუწყოს დედის ოსტეოპოროზის განვითარებას.

Aquamin™ Mg TG არის მაგნიუმი, რომელიც ზღვის წყალში წარმოქმნილი ბუნებრივი მინერალური წყაროდან მიიღება. ის ადამიანის ჯანმრთელობისთვის ერთ-ერთი უმნიშვნელოვანესი ელემენტია და ქალებს უფრო მეტი მოთხოვნილება აქვთ მასზე ორსულობისას და მშობიარობის შემდეგ. მაგნიუმი ჩართულია მეტაბოლურ პროცესებში, გავლენას ახდენს ნერვული იმპულსების გატარებასა და ელექტროლიტური ბალანსის შენარჩუნებაზე და აუცილებელია ძვლების ნორმალური ზრდისა და კუნთების ფუნქციონირებისთვის.

რკინა უაღრესად მნიშვნელოვანია ჯანმრთელობისთვის და მისი ძირითადი ბუნებრივი წყაროა წითელი ხორცი, ღვიძლი, კვერცხის გული და პარკოსნები. ის აუცილებელია ჰემოგლობინის წარმოქმნისთვის, რომელიც პასუხისმგებელია ჟანგბადის გადატანაზე ფილტვებიდან ქსოვილებში. რაციონში რკინის ადეკვატური შემცველობა ამცირებს ჰიპოქსიის, ანემიის, მცირეწონიანი ნაყოფის დაბადებისა და ნაადრევი მშობიარობის რისკს.

თუთია ჯანმრთელობისთვის ერთ-ერთი ყველაზე მნიშვნელოვანი მიკროელემენტია და მისით უმდიდრესი ბუნებრივი წყაროებია ხამანწკები, ცხოველების შიგნეული, გოგრის თესლები და ლობიო. ის აუცილებელია უჯრედების ნორმალური ზრდისა და გაყოფისთვის და მნიშვნელოვან როლს ასრულებს იმუნური და ნერვული სისტემების ფუნქციონირებაში. თუთიის დეფიციტმა შეიძლება გამოიწვიოს ზრდის შეფერხება, დაბადებისას დაბალი წონა და იმუნური სისტემის დასუსტება.

სპილენძი ყველაზე დიდი რაოდენობით გვხვდება ზღვის პროდუქტებში, ცხოველთა შიგნეულში, ცხვრის ხორცსა და კაკაოში. ის მნიშვნელოვან როლს ასრულებს სისხლის წითელი უჯრედებისა და ნეიროტრანსმიტერების ფორმირებაში, ასევე, იმუნური სისტემის ფუნქციონირებაში. სპილენძის დეფიციტი იშვიათია, მაგრამ შესაძლოა, გამოიწვიოს ანემია, კოლაგენის სინთეზის დარღვევა ან ნაყოფის იმუნური სისტემის დასუსტება.

მანგანუმი გვხვდება მარცვლეულში, პარკოსნებში, ზღვის პროდუქტებში, ტოფუსა და თხილში. ის ძალზე მნიშვნელოვანია ნაყოფის განვითარებისა და ლაქტაციის პერიოდში, რადგან მონაწილეობს ძვლის განვითარებაში, მეტაბოლურ პროცესებში, ანტისხეულების წარმოქმნასა და ანტიოქსიდანტური ფერმენტების მოქმედებაში. მანგანუმის დეფიციტმა შეიძლება გამოიწვიოს ძვლის ზრდისა და მინერალიზაციის დარღვევა, ასევე, იმუნური სისტემის შესუსტება და მეტაბოლიზმის დარღვევა.

SeleniumSeLECT^® არის სელენის უნიკალური ფორმა გაზრდილი ბიოშეღწევადობით. მისით უმდიდრესი ბუნებრივი წყაროა ბრაზილიური თხილი, ღვიძლი, წითელი ხორცი და ზღვის პროდუქტები. ის მნიშვნელოვან როლს ასრულებს ფარისებრი ჯირკვლის ფუნქციის რეგულირებაში, იმუნური სისტემის ფუნქციონირებაში და თავის ტვინისა და ნერვული სისტემის განვითარებაში. რაციონში სელენის ადეკვატური დონე ამცირებს ნაადრევი მშობიარობისა და მშობიარობის შემდგომი თირეოიდიტის რისკს.

ქრომს უხვად შეიცავს საფუარი, მარცვლეული, ფრინველის ხორცი და ზღვის პროდუქტები. ის უაღრესად მნიშვნელოვანია დედის სათანადო ჯანმრთელობისთვის, რადგან არეგულირებს სისხლში გლუკოზასა და ლიპიდების დონეს და მონაწილეობს ინსულინის წარმოქმნაში. დიეტაში ქრომის ადეკვატური დონე ხელს უშლის გესტაციური დიაბეტის განვითარებას.

იოდს ჯანმრთელობისთვის უაღრესად მნიშვნელოვანი ფუნქციები აქვს და მისი ძირითადი ბუნებრივი წყაროებია ზღვის პროდუქტები, იოდიზებული მარილი და კვერცხი. ესაა ძირითადი ელემენტი, რომელიც ფარისებრი ჯირკვლის ჰორმონების წარმოქმნაში მონაწილეობს. ფარისებრი ჯირკვლის გამართული ფუნქციონირება ზრდის დაორსულების შანსს და უაღრესად მნიშვნელოვანია მისი შენარჩუნებისა და ბავშვის სწორი განვითარებისთვის.